Vischnaunca Breil/Brigels
Nova carta d'identitad biometrica naven dils 2 da november 2026
Naven dad immediat dat ei la carta d'identitad svizra en duas variantas: Cun ni senza chip biometric.
Tgei ei la differenza e tgei ID ei la dretga per Vus?
👉 ID senza chip – vinavon da retrer tier nossa vischnaunca
- Sufficients per s’identificar en Svizra.
- Adattada per persunas che dovran la carta principalmein sco document d’identitad el mintgadi.
- Sa vegnir empustada vinavon sco tochen dacheu tier la vischnaunca.
- Las cartas d’identitad senza chip gia emessas restan valeivlas entochen la scadenza. Ellas san vinavon vegnir duvradas per viadis ella UE, aschilunsch che la tiara da destinaziun accepta quellas.
👉 Nova ID biometrica cun chip – da retrer tier il biro da pass cantunal
- Cuntegn in chip cun maletg dalla fatscha e duas improntas dils dets.
- Porscha protecziun supplementara encunter sfalsificaziuns e maldiever.
- Vegn recumandau dalla confederaziun cunzun per persunas che viageschan regularmein ell'UE e che possedan negin passaport biometric.
- Ella ei preparada per las futuras disposiziuns da viagiar dall'UE planisadas.
Sin fundament d'ina adattaziun planisada dalla cunvegna davart la libra circulaziun da persunas vegnan per viadis ell'UE egl avegnir probablamein mo pli cartas d'identitad cun chip acceptadas. Tgi che vul pia era viagiar egl avegnir culla ID ell'UE ei gia preparaus culla ID biometrica.
Il termin exact ei aunc buca fixaus. Tenor stan da planisaziun actual vegn quintau cun in'entrada en vigur sil pli baul l'entschatta 2028. La nova reglamentaziun per cartas d'identitad senza chip valess aschia sil pli baul naven dall'entschatta 2029.
Tgei cuosta la ID?
Las taxas restan senza midadas e valan per ID cun ni senza biometria:
- Carschi: CHF 65.– + CHF 5.– porto
- Affons e giuvenils entochen 18 onns: CHF 30.– + CHF 5.– Porto
Bien da saver:
L'introducziun dalla nova ID biometrica munta buca che Vus stueis remplazzar Vossa ID d'entochen dacheu. L'elecziun denter las duas variantas resta voluntaria.
Per la controlla automatica da passaport (e-Gates) alla plazza aviatica da Turitg basegna ei vinavon in passaport biometric.
Ulteriuras informaziuns:
https://www.fedpol.admin.ch/de/newnsb/6iRwkP1yLKhU
https://www.fedpol.admin.ch/de/pass-und-identitaetskarte
