Gia daditg savevan ins che la statua da Sogn Nepomuc sin la punt veglia enta Cuort seigi en schliet stan. La primavera 2025 han la pleiv ensemen cun il Forum cultural Beil decidiu da schar sclarir ina fatschenta dil fatg co ei stetti propi cun la statua. Ella gasetta FORUM dil mars ei vegniu informau en caussa.
L’expertisa da pliras persunas dil fatg ha cuzzau bien e ditg ed in extract dil rapport muossa il suandont:
Il S. Nepomuc da Breil ei buca mo da gronda bellezia, mobein era fetg interessants neu dalla historia d’art. Igl ei in’ovra digl art popular ed in exempel impressiunont da viva veta religiusa. Ina dataziun exacta dalla statua ei buca pusseivla, fetg probabel eis ella vegnida entagliada el decuors dil 17avel tschentaner.
Ils donns entras vegliadetgna, influenzas da temperatura, sulegl e humiditad ein fetg gronds. La statua ha circa 55 scarps ni fessas, era egl intern. Ils mauns ein fetg donnegiai, la detta maunca. La sperdita da substanza ei fetg gronda, tuttina muossa la statua aunc sia expressiun ed autenticitad originala. La fatscha ha piars ses tratgs fins ed ei cheutras strusch reparabla.
Restaurar la statua senza far pli grondas intervenziuns (Eingriffe) vid fatscha, corpus e vestgiu ei buca pusseivel. Cheutras perdess la statua sia expressiun originala e sia autenticitad.
Risguardond quels fatgs recamonda la fatschenta specialisada da conservar la statua originala e plazzar quella en ina caplutta. Per la punt vegn recumandau da schar entagliar ina copia dalla statua originala. La suprastonza da pleiv ensemen cun il Forum cultural ein sedecidi per quella varianta. L’execuziun da quellas lavurs inclusiv restaurar la vitrina vegn calculada cun circa 14’000 francs.
Nus engraziein per scadina donaziun sut IBAN CH19 8080 8006 7821 2607 8 cun la remarca ‘Nepomuc’.
Pleiv catolica-romana e Forum cultural Breil
