Las scolas dalla vischnaunca da Breil han la finamira da porscher ina scolaziun cumpleta en vischnaunca. Quei vul dir che mintg’affon duei vegnir promovius sin tut ils scalems dalla scola populara tenor ses basegns. Las scolaras ed ils scolars vegnan instrui en las duas casas da scola da Breil e Danis.
 |
|
 |
Casa da scola Breil
Scoletta
Scola primara: 1. – 4. classa
Scola pintga integrada
|
|
Casa da scola Danis
Scoletta
Scola primara: 5. – 6. classa
Scola superiura: tuttas classas
Scola pintga integrada |
La scoletta da Breil sesanfla el plaunterren dalla scola e stat a disposiziun als scolarets da Breil-vitg. Omisduas annadas ensemen dumbran 14 affons. Ils 12 scolarets da Da-nis-Tavanasa e Dardin visetan la scoletta a Danis. Ella sesanfla en casa da scola veglia ed ei fetg spaziusa. Las duas annadas vegnan mintgamai instruidas da cuminonza ellas duas scolettas.
La scola primara vegn menada en sis partiziuns da mintgamai ina classa. Las empremas quater classas che vegnan instruidas a Breil dumbran 61 scolars. Da quels habite-schan 27 affons els vischinadis da Danis-Tavanasa e Dardin. Il viadi a scola fan els cul bus da scola. In viadi cuoza 12 minutas. Ils 33 scolars dalla 5avla e 6avla classa van a Danis a scola.
Ils 34 scolars dalla scola superiura van tuts a Danis a scola. L’instrucziun succeda tenor il model d’instrucziun B. Ferton ch’ils lungatgs e la matematica vegnan instrui allas sin-gulas classas secundaras e realas separadamein, vegnan ils roms musics mintgamai instrui all’entira classa. Cun in diember da scolars surveseivel eis ei pusseivel da por-scher in ault grad dad individualisaziun.
Scolars cun basegns specials da scolaziun frequentan duront singulas lecziuns la classa pintga, per regla en ils roms matematica, romontsch e tudestg. Cheu en ina gruppa d’ emprender pli pintga sa la scolasta sustener e promover mintga scolar individualmein. Aschia han era quels scolars la pusseivladad da contonscher buns resultats e cheutras rinforzar la confidonza en sesez. Ils 9 scolars dalla classa pintga ein pia integrai socia-lmein ellas classas regularas e retscheivan leu nua ch’ei fa basegns sustegn individual.
L’instrucziun religiusa vegn purschida dallas treis pleivs da vischnaunca e vegn dada tenor il plan d’instrucziun ecumen. Las lecziuns ein integradas egl urari. Affons d’autras religiuns san era separticipar all’instrucziun sche quei vegn giavischau.
|
Sustegn per scolars da lungatg jester |
Adina puspei vegn la scola confruntada cun scolars che derivan dad autras tiaras e cul-turas. Per integrar quels affons schi spert sco pusseivel el menaschi da scola regulau, retscheivan els instrucziun da romontsch speciala. Quella vegn adattada allas habilitads dil scolar pertuccau.
Ina scola per tuts vul dir ch’era affons che san buca frequentar ina classa regulara duein vegnir integrai ella scola da vischnaunca, quei tenor las pusseivladads e habilitads da tuts pertuccai. En stretg contact cun il Center da cumpetenza Casa Depuoz Trun, ha la scola fatg bunas experientschas en quei grau.
Affons che drovan sustegn en logopedia (= problems linguistics), legastenia (= pro-blems da leger e scriver), discalculia (=problems da quintar) retscheivan instrucziun speciala tier terapeutas u terapeuts dil fatg. Per regla vegnan quellas terapias purschi-das el liug duront il temps da scola.
|
